News Detail
ពិធីសម្ពោធ និងប្រកាសដាក់ឱ្យដំណើរការជាផ្លូវការអង្គភាពច្រកចេញចូលតែមួយ និងការិយាល័យប្រជាពលរដ្ឋរាជធានី ខេត្ត
Resource: OWSO
ពោធិ៍សាត់៖ នាព្រឹកថ្ងៃទី២២ ខែមករា ឆ្នាំ២០២០ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ និងជាប្រធាន គ.ជ.អ.ប បានអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធ និងប្រកាសដាក់ឱ្យដំណើរការជាផ្លូវការអង្គភាពច្រកចេញចូលតែមួយ និងការិយាល័យប្រជាពលរដ្ឋរាជធានី ខេត្តទាំង២៥រាជធានី ខេត្ត នៅសាលាខេត្តពោធិ៍សាត់។ 
ពិធីនេះមានការអញ្ជើញចូលរួមពីសមាជិកព្រឹទ្ធសភា រដ្ឋសភាព ថ្នាក់ដឹកនាំក្រសួង ស្ថាប័នពាក់ព័ន្ធនានានៅថ្នាក់ជាតិ និងថ្នាក់ក្រោមជាតិ ដៃគូអភិវឌ្ឍន៍ ព្រមទាំងអាជ្ញាធរមូលដ្ឋាន អាជីវករ ពាណិជ្ជករ ព្រះសង្ឈ លោកគ្រូ អ្នកគ្រូ សិស្ស និស្សិតក្នុងខេត្តពោធិ៍សាត់ សរុបប្រមាណ៤០០០រូប។ 
ថ្លែងសេចក្តីរាយការណ៍ក្នុងពិធីនេះ ឯកឧត្តម ម៉ៅ ធនិន្ទ អភិបាលនៃគណៈអភិបាលខេត្តពោធិ៍សាត់ បានបញ្ជាក់ថា អង្គភាពច្រកចេញចូលតែមួយ និងការិយាល័យប្រជាពលរដ្ឋខេត្តពោធិ៍សាត់ បានដាក់ឱ្យដំណើរការជាបណ្ដោះអាសន្ន ដើម្បីផ្តល់សេវាជូនប្រជាពលរដ្ឋ កាលពីខែតុលា ឆ្នាំ២០១៨ ដែលកំពុងដំណើរការផ្ដល់សេវាជូនប្រជាពលរដ្ឋយ៉ាងសស្រាក់សស្រាំចំនួន១៤វិស័យ។ ឯកឧត្តមបានបញ្ជាក់បន្ថែមថា ក្រៅអំពីការបង្កើតអង្គភាពច្រកចេញចូលតែមួយ នៅក្នុងខេត្តពោធិ៍សាត់ ក៏បានដាក់ឱ្យដំណើរការការិយាល័យច្រកចេញចូលតែមួយ និងការិយាល័យប្រជាពលរដ្ឋនៅក្រុង ស្រុកចំនួនពីរ និងរៀបចំជាយន្តការច្រកចេញចូលតែមួយសម្រាប់ស្រុកមិនទាន់មានលក្ខណសម្បតិ្តគ្រប់គ្រាន់ក្នុងការបង្កើតឱ្យមានការិយាល័យច្រកចេញចូលតែមួយ ។ ថ្លែងសេចក្តីរាយការណ៍ក្នុងពិធីនេះផងដែរ ឯកឧត្តម ប្រាក់ សំអឿន អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ បានបញ្ជាក់ថា អង្គភាពច្រកចេញចូលតែមួយនីមួយទាំង២៥រាជធានី ខេត្ត បាន និងកំពុងផ្តល់សេវាចំនួន៥៥៩ប្រភេទសេវាលើវិស័យជំនាញចំនួន១៥។ ចាប់តាំងពីការដាក់ឱ្យដំណើរការអង្គភាពច្រកចេញចូលតែមួយ នៅពាក់កណ្តាលឆ្នាំ២០១៨ រហូតមកដល់ចុងឆ្នាំ២០១៩នេះ អង្គភាពច្រកចេញចូលតែមួយទាំង២៥រាជធានី ខេត្តបានផ្តល់សេវាសរុបចំនួន៦៩៤.៩៦៧សេវា និងទទួលបានចំណូលចំនួន៥៦.០៧១.០០៧.១៥៨រៀល (ហាសិបប្រាំមួយប៊ីលាន ចិតសិបមួយលាន ប្រាំពីរពាន់ និងមួយរយហាសិបប្រាំបីរៀល) ប្រហែលជាង១៤លានដុល្លាអាមេរិក។ 
ឯកឧត្តម បានមានប្រសាសន៍បន្ថែមថា ទន្ទឹមនឹងការដាក់ឱ្យដំណើរការអង្គភាពច្រកចេញចូលតែមួយ អគ្គនាយកដ្ឋានរដ្ឋបាលក៏បានគាំទ្រដល់ការរៀបចំ និងដាក់ឱ្យដំណើរការការិយាល័យប្រជាពលរដ្ឋរាជធានី ខេត្តផងដែរ។ ការិយាល័យប្រជាពលរដ្ឋ គឺជាយន្តការអព្យាក្រឹតមួយ ដែលត្រូវបានបង្កើតឡើងក្នុងគោលបំណងលើក កម្ពស់អភិបាលកិច្ចល្អក្នុងការផ្តល់សេវាសាធារណៈនៅរដ្ឋបាលថ្នាក់ក្រោមជាតិ តាមរយៈការទទួល និងការសម្រុះសម្រួលដោះស្រាយបណ្តឹងនៅក្រៅប្រព័ន្ធតុលាការ ពាក់ព័ន្ធនឹងការផ្តល់សេវាសាធារណៈ និងការគ្រប់គ្រងរដ្ឋបាលនៅថ្នាក់ក្រោមជាតិ ប្រកបដោយតម្លាភាព គណនេយ្យភាព និង ប្រសិទ្ធភាពសំដៅបង្កើនជំនឿទុកចិត្តរបស់ប្រជាពលរដ្ឋនៅមូលដ្ឋាន។ នៅក្នុងពិធីសម្ពោធនេះ សម្តេចក្រឡាហោម បានមានប្រសាសន៍ថា ការសម្ពោធដាក់ឱ្យដំណើរការជាផ្លូវការនូវអង្គភាពច្រកចេញចូលតែមួយ និងការិយាល័យប្រជាពលរដ្ឋរាជធានី ខេត្តទាំង២៥រាជធានី ខេត្តនេះ គឺជាសមិទ្ធផលថ្មីមួយទៀតដែលរួមចំណែកសម្រេចឱ្យបាននូវចក្ខុវិស័យរបស់រាជរដ្ឋាភិបាលក្នុងកម្មវិធីកំណែទម្រង់វិមជ្ឈការ និងវិសហមជ្ឈការ តាមរយៈការលើកកម្ពស់ប្រសិទ្ធភាព និងគុណភាពនៃការផ្តល់សេវារដ្ឋបាលឱ្យបានកាន់តែល្អប្រសើរឡើងជូនប្រជាពលរដ្ឋ។ សម្តេចមានប្រសាសន៍បន្តថា ការបង្កើតយន្តការច្រកចេញចូលតែមួយសម្រាប់ការផ្ដល់សេវារដ្ឋបាលនៅរដ្ឋបាលថ្នាក់ក្រោមជាតិ ក្នុងបែបផែនជាអង្គភាពច្រកចេញចូលតែមួយនៅថ្នាក់រាជធានី ខេត្ត ឬជាការិយាល័យច្រកចេញចូលតែមួយនៅថ្នាក់ក្រុង ស្រុក ខណ្ឌ ឬជាយន្តការច្រកចេញចូលតែមួយនៅថ្នាក់ស្រុក និងឃុំ សង្កាត់ គឺមានគោលបំណង បង្កលក្ខណៈងាយស្រួល និងឆ្លើយតបទាន់ពេលវេលាទៅនឹងតម្រូវការ និងសំណូមពររបស់ប្រជាពលរដ្ឋ តាមរយៈការប្រមូលផ្ដុំការផ្ដល់សេវារដ្ឋបាលលើវិស័យនានានៅកន្លែងតែមួយ។ 
សម្តេចបានបង្ហាញជាបទពិសោធន៍ថា បណ្ដាប្រទេសជឿនលឿនដែលមានប្រព័ន្ធគ្រប់គ្រងរដ្ឋបាលបែបទំនើបបានអនុវត្តយន្តការច្រកចេញចូលតែមួយនេះ ដើម្បីកាត់បន្ថយនូវភាពស្មុគស្មាញ និងភាពសាំញ៉ាំនៃបែបបទ និងនីតិវិធីរដ្ឋបាល ដើម្បីជួយសម្រួលដល់ប្រជាពលរដ្ឋក្នុងការស្នើសុំសេវានានាពីរដ្ឋបាលសាធារណៈ។ យន្តការច្រកចេញចូលតែមួយត្រូវបានទទួលការវាយតម្លៃខ្ពស់ និងទាក់ទាញបាននូវការគាំទ្រពីអ្នកប្រើប្រាស់សេវា តាមរយៈការកាត់បន្ថយបានជាអតិបរមានូវការិយាធិបតេយ្យ និងអំពើពុករលួយក្នុងការស្នើសុំសេវានានាពីស្ថាប័នរដ្ឋ។ សម្តេចបានបញ្ចាក់ថា សម្រាប់ប្រទេសកម្ពុជា បានអនុវត្តយន្តការច្រកចេញចូលតែមួយរយៈពេលប្រមាណ១៥ឆ្នាំរួចមកហើយ ដោយចាប់ផ្តើមពីគម្រោងសាកល្បងនៅស្រុកបាត់ដំបង នៃខេត្តបាត់ដំបង និងស្រុកសៀមរាប នៃខេត្តសៀមរាប ក្នុងឆ្នាំ២០០៥។ គិតមកដល់ដំណាច់ឆ្នាំ២០១៩កន្លងមកនេះ ការិយាល័យច្រកចេញចូលតែមួយ និងការិយាល័យប្រជាពលរដ្ឋ ត្រូវបានបង្កើតឡើងនៅថ្នាក់ក្រុង ស្រុក ខណ្ឌ បានចំនួន១១៥ នៃរាជធានី ខេត្តទាំង២៥ ដែលក្នុងនោះរួមមាន៖ រដ្ឋបាលក្រុងចំនួន២៧ រដ្ឋបាលស្រុកចំនួន៧៤ និងរដ្ឋបាលខណ្ឌចំនួន១៤ ស្មើនឹង៥៧% នៃចំនួនរដ្ឋបាលក្រុង ស្រុក ខណ្ឌ ចំនួន២០៣ ទូទាំងប្រទេស។ ចំណែកថ្នាក់រាជធានី ខេត្ត យើងបានបង្កើតជាអង្គភាពច្រកចេញចូលតែមួយទាំង២៥រាជធានី ខេត្ត ដែលកំពុងសម្ពោធ និងដាក់អោយដំណើរការជសផ្លូវការនៅពេលនេះ។ ជាមួយគ្នានេះដែរ ក្រសួងបាននិងកំពុងរៀបចំជាយន្តការច្រកចេញចូលតែមួយសម្រាប់ស្រុកមិនទាន់មានលក្ខណសម្បតិ្តគ្រប់គ្រាន់ក្នុងការបង្កើតឱ្យមានការិយាល័យច្រកចេញចូលតែមួយផងដែរ ។
