News Detail
កិច្ចប្រជុំពិនិត្យ និងវាយតម្លៃការផ្តល់សេវារដ្ឋបាលតាមអង្គភាពច្រកចេញចូលតែមួយ នៃរដ្ឋបាលខេត្តព្រះសីហនុ
Published Date: July 7, 2026
Resource: OWSO
ខេត្តព្រះសីហនុ៖ ព្រឹកថ្ងៃចន្ទ ៧រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៦ ខែកក្កដា ឆ្នាំ២០២៦ លោក អ៊ឹង កែវរតនៈ ប្រធាននាយកដ្ឋានមុខងារ និងធនធាន បានដឹកនាំក្រុមការងារនាយកដ្ឋានមុខងារ និងធនធាន ចូលរួមកិច្ចប្រជុំពិនិត្យ និងវាយតម្លៃការផ្តល់សេវារដ្ឋបាលតាមអង្គភាពច្រកចេញចូលតែមួយ នៃរដ្ឋបាលខេត្តព្រះសីហនុ។
កិច្ចប្រជុំពិនិត្យ និងវាយតម្លៃនេះ ប្រព្រឹត្តទៅក្រោមការដឹកនាំរបស់ ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ និងមានការអញ្ចើញចូលរួម ពីតំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងរៀបចំដែនដី នគរូបនីយកម្ម និងសំណង់ អគ្គនាយកដ្ឋានសវនកម្មផ្ទៃក្នុង តំណាងលេខាធិការដ្ឋាន គ.ជ.អ.ប ឯកឧត្តមអភិបាល-អភិបាលរងខេត្ត នាយក-នាយករងរដ្ឋបាល អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ប្រធានអង្គភាពច្រកចេញចូលតែមួយ នាយកទីចាត់ការផែនការ និងវិនិយោគ នាយកទីចាត់ការអន្តរវិស័យ នាយកទីចាត់ការហិរញ្ញវត្ថុ ប្រធានការិយាល័យប្រជាពលរដ្ឋ អភិបាលក្រុង ស្រុក ប្រធានការិយាល័យរៀបចំដែនដី នគរូបនីយកម្ម សំណង់ និងភូមិបាលក្រុង ស្រុក និងមន្រ្តីពាក់ព័ន្ធសរុបប្រមាណ ៨០រូប។
គោលបំណងនៃកិច្ចប្រជុំពិនិត្យ និងវាយតម្លៃនាពេលនេះ គឺដើម្បីផ្ដល់ការគាំទ្រ និងពង្រឹងប្រសិទ្ធភាព នៃការផ្តល់សេវាដែលស្ថិតក្នុងសមត្ថកិច្ចរដ្ឋបាលខេត្ត ដោយផ្តោតលើចំណុចមួយចំនួន រួមមាន៖
១. វឌ្ឍនភាព និងបញ្ហាប្រឈមពាក់ព័ន្ធនឹងការផ្តល់សេវារដ្ឋបាលអង្គភាពច្រកចេញចូលតែមួយ
២. ការគ្រប់គ្រង និងដឹកនាំរបស់រដ្ឋបាលខេត្តក្នុងការជំរុញ និងផ្តល់សេវារដ្ឋបាលជូនប្រជាពលរដ្ឋ នៅក្នុងដែនសមត្ថកិច្ច
៣. ការពិភាក្សាលើបញ្ហាប្រឈម និងសំណើសំណូមពរនានា ដើម្បីពង្រឹងប្រសិទ្ធភាពនៃការផ្ដល់សេវា។
