ព័ត៌មានលម្អិត
ពិធីបិទសិក្ខាសាលាប្រចាំឆ្នាំ២០១៨ និងលើកទិសដៅសកម្មភាពឆ្នាំ២០១៩ នៃការអនុវត្តការងារច្រកចេញចូលតែមួយ និងការសម្រុះសម្រួលបណ្តឹងរបស់រដ្ឋបាលថ្នាក់ក្រោមជាតិ
ថ្ងៃចេញផ្សាយ: February 22, 2019
ប្រភព: OWSO
លទ្ធផលការងារឆ្នាំ២០១៨ និងលើកទិសដៅសកម្មភាពឆ្នាំ២០១៩ នៃការអនុវត្តការងាររបស់ច្រកចេញចូលតែមួយ និងការសម្រុះសម្រួលបណ្តឹងរបស់រដ្ឋបាលថ្នាក់ក្រោមជាតិ បានលើកយកមកបង្ហាញ និងពិភាក្សា នៅក្នុងកិច្ចប្រជុំរយៈពេលពីរថ្ងៃ ដែលប្រព្រឹត្តទៅនៅថ្ងៃទី២១ និង២២ ខែកុម្ភៈ ឆ្នាំ២០១៩ នៅសាលប្រជុំសាលាខេត្តកំពង់ចាម។ ពិធីបិទកិច្ចប្រជុំជាផ្លូវការបានរៀបចំឡើងនៅរសៀលថ្ងៃទី២២ ខែកុម្ភៈ ឆ្នាំ២០១៩ ក្រោមអធិបតីភាព ឯកឧត្តម ប្រាក់ សំអឿន អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ។
ពិធីនេះមានការអញ្ជើញចូលរួមពីថ្នាក់ដឹកនាំ និងមន្រ្តីក្រសួងមហាផ្ទៃ តំណាងក្រសួងពាក់ព័ន្ធ នាយក នាយករងរដ្ឋបាលសាលារាជធានី ខេត្ត ប្រធានអង្គភាពច្រកចេញចូលតែមួយរាជធានី ខេត្ត ប្រធានការិយាល័យប្រជាពលរដ្ឋរាជធានី ខេត្ត អភិបាល អភិបាលរងក្រុង ស្រុក ខណ្ឌ ប្រធានការិយាល័យច្រកចេញចូលតែមួយ និងប្រធានការិយាល័យប្រជាពលរដ្ឋ សរុបប្រមាណ៣០០នាក់។
បន្ទាប់ពីលោក បួន ហេង ប្រធាននាយកដ្ឋានមុខងារ និងធនធាន នៃអគ្គនាយកដ្ឋានរដ្ឋបាល ក្រសួងមហាផ្ទៃ បានឡើងធ្វើរបាយការណ៍បូកសរុបលទ្ធផលនៃសិក្ខាសាលារួចមក ឯកឧត្តម ប្រាក់ សំអឿន បានមានមតិសំណេះសំណាល និងសម្តែងនូវការកោតសរសើរចំពោះថ្នាក់ដឹកនាំ មន្ដ្រីទទួលខុសត្រូវគ្រប់លំដាប់ថ្នាក់នៃក្រសួង ស្ថាប័នពាក់ព័ន្ធ អាជ្ញាធររាជធានី ខេត្ដ ក្រុង ស្រុក ខណ្ឌគោលដៅ និងមន្ដ្រី បុគ្គលិកទាំងអស់ ដែលបានរួមចំណែកយ៉ាងសកម្មក្នុងការគាំទ្រ និងអនុវត្ដការផ្តល់សេវាតាមច្រកចេញចូលតែមួយទទួលបាននូវសមិទ្ធផលល្អប្រសើរជាច្រើនក្នុងឆ្នាំ២០១៨កន្លងមក។
ឯកឧត្តមមានប្រសាសន៍ថា ការបង្កើតឡើងនូវយន្តការច្រកចេញចូលតែមួយ និងយន្តការសម្រុះសម្រួលដោះស្រាយបណ្តឹងតវ៉ាបស់ប្រជាពលរដ្ឋ គឺមានទិសដៅលើកកម្ពស់អភិបាលកិច្ចល្អក្នុងការផ្ដល់សេវារដ្ឋបាលចាំបាច់នានាជូនប្រជាពលរដ្ឋ ប្រកបដោយប្រសិទ្ធភាព សំដៅធ្វើយ៉ាងណាឱ្យប្រជាពលរដ្ឋទទួលបានសេវាទាំងនោះកាន់តែងាយស្រួល ឆាប់រហ័ស មានតម្លាភាព និងកសាងជំនឿទុកចិត្តរបស់ប្រជាពលរដ្ឋជាមួយរដ្ឋបាលសាធារណៈ។
ឯកឧត្តមបន្ថែមថា ថ្នាក់ដឹកនាំ និងបុគ្គលិកដែលបំពេញការងារនៅក្នុងយន្តការច្រកចេញចូលតែមួយ និងការិយាល័យប្រជាពលរដ្ឋ គឺជាតួអង្គដ៏សំខាន់ និងមានមោទនភាពយ៉ាងធំធេង ដែលបានរួមចំណែកដោយផ្ទាល់ក្នុងកិច្ចការកំណែទម្រង់ដ៏មានសារៈសំខាន់នេះ។
មកត្រឹមឆ្នាំ២០១៨ មានក្រុង ស្រុក ខណ្ឌគោលដៅចំនួន៨៣គោលដៅ នៅទូទាំង២៥រាជធានី ខេត្តដែលបានបង្កើតការិយាល័យច្រកចេញចូលតែមួយ និងការិយាល័យប្រជាពលរដ្ឋ ហើយបាននឹងកំពុងប្រតិបត្តិការផ្ដល់សេវារដ្ឋបាលយ៉ាងសកម្មជាប្រចាំមានចំនួន៥២គោលដៅ ជូនដល់ប្រជាពលរដ្ឋក្នុងដែនសមត្ថកិច្ចរបស់ខ្លួន និង៣១គោលដៅទៀតនឹងដាក់ឱ្យដំណើរការផ្ដល់សេវាក្នុងត្រីមាសទី២ឆ្នាំ២០១៩នេះ។ នាពេលថ្មីៗនេះ ក្រសួងមហាផ្ទៃ បានដាក់ចេញនូវសេចក្តីណែនាំលេខ០០១ សណន ចុះថ្ងៃទី២៣ ខែមករា ឆ្នាំ២០១៩ ស្ដីពីការបង្កើតយន្តការច្រកចេញចូលតែមួយនៅរដ្ឋបាលស្រុក ដែលពុំទាន់មានលក្ខណសម្បត្តិគ្រប់គ្រាន់ក្នុងការបង្កើតការិយាល័យច្រកចេញចូលតែមួយ។ ដូច្នេះ រដ្ឋបាលស្រុកទាំងឡាយណាដែលមិនទាន់បង្កើតការិយាល័យច្រកចេញចូលតែមួយ ក៏អាចផ្ដល់សេវាបានដូចនឹងស្រុកដែលមានការិយាល័យច្រកចេញចូលតែមួយ តាមរយៈការរៀបចំ និងដាក់ឱ្យដំណើរការយន្តការច្រកចេញចូលតែមួយ។ ជាងនេះទៀត ក្រសួងមហាផ្ទៃក៏នឹងត្រូវដាក់ចេញលិខិតបទដ្ឋានណែនាំដល់រដ្ឋបាលឃុំ សង្កាត់ ឱ្យបង្កើតយន្តការច្រកចេញចូលតែមួយសម្រាប់ផ្តល់សេវារដ្ឋបាលជូនប្រជាពលរដ្ឋក្នុងដែនសមត្ថកិច្ចរបស់ខ្លួនផងដែរ។
ឯកឧត្តមមានប្រសាសន៍បន្ថែមថា សមិទ្ធផល និងលទ្ធផលទាំងនេះកើតចេញពីការខិតខំប្រឹងប្រែង ការគាំទ្រ និងការចូលរួមយ៉ាងសកម្មរបស់ឯកឧត្ដម លោកជំទាវ អស់លោក លោកស្រី មន្ដ្រីរាជការ បុគ្គលិក ដៃគូអភិវឌ្ឍន៍ និងអ្នកពាក់ព័ន្ធទាំងអស់ទាំងនៅថ្នាក់ជាតិ និងនៅរដ្ឋបាលថ្នាក់ក្រោមជាតិ។
ជាចុងក្រោយ ឯកឧត្តមបានណែនាំដល់រដ្ឋបាលរាជធានី ខេត្ត រដ្ឋបាលក្រុង ស្រុក ខណ្ឌត្រូវខិតខំបង្កលក្ខណៈងាយស្រួលក្នុងការផ្ដល់សេវារដ្ឋបាលជូនប្រជាពលរដ្ឋ ដោយធានាថា មន្ត្រី បុគ្គលិកនៃអង្គភាពច្រកចេញចូលតែមួយរាជធានី ខេត្ត និងការិយាល័យច្រកចេញចូលតែមួយក្រុង ស្រុក ខណ្ឌ ផ្ដល់សេវាប្រកបដោយប្រសិទ្ធភាព តម្ភាភាព ភាពរួសរាយរាក់ទាក់ មានក្រមសីលធម៌ និងមនសិការវិជ្ជាជីវៈខ្ពស់បំផុត។ ចំណែកការិយាល័យប្រជាពលរដ្ឋនៃរដ្ឋបាលរាជធានី ខេត្ត និងការិយាល័យប្រជាពលរដ្ឋនៃរដ្ឋបាលក្រុង ស្រុក ខណ្ឌ ត្រូវប្រកាន់ជំហរអព្យាក្រឹតក្នុងការអនុវត្ដមុខងាររបស់ខ្លួនក្នុងការទទួល និងសម្រុះសម្រួលដោះស្រាយបណ្ដឹងនានារបស់ប្រជាពលរដ្ឋពាក់ព័ន្ធនឹងការផ្តល់សេវាសាធារណៈ និងការគ្រប់គ្រងរដ្ឋបាលនៅថ្នាក់រដ្ឋបាលរបស់ខ្លួន ប្រកបដោយតម្លាភាព គណនេយ្យភាព និងប្រសិទ្ធភាព សំដៅបង្កើនជំនឿទុកចិត្តរបស់ប្រជាពលរដ្ឋនៅក្នុងមូលដ្ឋាន។