លោកប្រធានបានផ្តាំផ្ញើដល់រដ្ឋបាលក្រុង ស្រុក ខណ្ឌទាំងអស់ សូមធ្វើការផ្តល់សេវាជូនប្រជាពលរដ្ឋឱ្យស្របតាមគោលការណ៍ បែបបទ និងនីតិវិធីនៃការផ្តល់សេវាដែលមានកំណត់នៅក្នុងលិខិតបទដ្ឋានគតិយុទ្ធជាធរមាន ជាពិសេសបែបបទ និងនីតិវិធីដែលបានកែសម្រួលថ្មីនេះ។

លោកមានប្រសាសន៍ថា ការផ្តល់សេវារដ្ឋបាល គឺជាការពិនិត្យទៅលើឯកសារប៉ុណ្ណោះ ដូច្នេះអោយតែត្រឹមត្រូវតាមបទដ្ឋានបច្ចេកទេស គឺត្រូវផ្តល់ជូនគាត់ទៅ សូមកុំបន្ថែមសង្វាក់រដ្ឋបាលអោយស្មុគស្មាញដល់ប្រជាពលរដ្ឋថែមទៀត។

លោកមានប្រសាសន៍បន្ថែមថា ការផ្តល់សេវាតាមការិយាល័យច្រកចេញចូលតែមួយ គឺជាការបន្ថយនូវភាពស្មុគ្រស្មាញរបស់ប្រជាពលរដ្ឋ កាត់បន្ថយការិយាធិបតេយ្យ និងពន្លឿនការផ្តល់សេវាជូនប្រជាពលរដ្ឋ ក្នុងគោលបំណងលើកកំពស់អភិបាលកិច្ចល្អក្នុងការផ្តល់សេវាសាធារណៈជូនប្រជាពលរដ្ឋ។

គួរបញ្ជាក់ផងដែរថា ក្នុងឆ្នាំកន្លងទៅនេះ រាជរដ្ឋាភិបាលកម្ពុជាបានដាក់ចេញនូវអនុក្រឹត្យចំនួន០៣ រួមមានអនុក្រឹត្យលេខ១៨២, ១៨៣ និង១៨៤ អនក្រ.បក ចុះថ្ងៃទី០២ ខែធ្នូ ឆ្នាំ២០១៩ ស្តីពីមុខងារ និងរចនាសម្ព័ន្ធរដ្ឋបាលក្រុង ស្រុក ខណ្ឌ ដោយបានរៀបចំកែសម្រួលឡើងវិញនូវមុខងារ និងរចនាសម្ព័ន្ធរដ្ឋបាលក្រុង ស្រុក ខណ្ឌ ក្នុងគោលបំណងលើកកម្ពស់ប្រសិទ្ធភាពក្នុងការគ្រប់គ្រងរដ្ឋបាល ការផ្តល់សេវាសាធារណៈ និងការអភិវឌ្ឍមូលដ្ឋាន។ អនុក្រឹត្យទាំងនេះបានតម្រូវឱ្យធ្វើសមាហរណកម្មការិយាល័យជំនាញរបស់ក្រសួង ស្ថាប័ននានានៅថ្នាក់ក្រុង ស្រុក ខណ្ឌ ចូលទៅក្នុងរចនាសម្ព័ន្ធថ្មីរបស់រដ្ឋបាលក្រុង ស្រុក ខណ្ឌ ដែលធ្វើឱ្យមន្រ្តីរបស់ការិយាល័យ អង្គភាពជំនាញនានាក្លាយទៅជាមន្រ្តីក្នុងក្របខណ្ឌតែមួយរបស់រដ្ឋបាលក្រុង ស្រុក ខណ្ឌ។ អនុក្រឹត្យទាំង៣នេះក៏បានកំណត់បង្កើតឱ្យមានការិយាល័យច្រកចេញចូលតែមួយនៅគ្រប់រដ្ឋបាលក្រុង ស្រុក ខណ្ឌទូទាំងប្រទេស និងពងី្រកមុខងារក្នុងការផ្ដល់សេវារដ្ឋបាលថ្មីៗបន្ថែមទៀតផងដែរ។

បន្ទាប់ពីរាជរដ្ឋាភិបាលបានសម្រេចកែសម្រួលមុខងារ និងរចនាសម្ព័ន្ធថ្មីរបស់រដ្ឋបាលក្រុង ស្រុក ខណ្ឌរួចហើយ អគ្គនាយកដ្ឋានរដ្ឋបាល ក្រសួងមហាផ្ទៃ តាមរយៈនាយកដ្ឋានមុខងារ និងធនធាន ដែលជាសេនាធិការ បានរៀបចំវគ្គបណ្តុះបណ្តាលស្តីពីគោលការណ៍ បែបបទ និងនីតិវិធីនៃការផ្តល់សេវារដ្ឋបាលនៅការិយាល័យច្រកចេញចូលតែមួយ ដែលបានកែសម្រួលថ្មី ជាបន្តបន្ទាប់ចំនួន៤លើក រួចរាល់ ជូនដល់ក្រុង ស្រុក ខណ្ឌទាំង២០៣នៅទូទាំងប្រទេស។

ទន្ទឹមនឹងនេះដែរ ក្រសួងមហាផ្ទៃ បាន និងកំពុងសហការជាមួយក្រសួងស្ថាប័នពាក់ព័ន្ធដែលបានផ្ទេរមុខងារជូនរដ្ឋបាលក្រុង ស្រុក ខណ្ឌដើម្បីផ្តល់វគ្គបណ្តុះបណ្តាលជំនាញបច្ចេកទេសតាមវិស័យនីមួយៗ ដើម្បីធានាការផ្តល់សេវារដ្ឋបាលតាមការិយាល័យច្រកចេញចូលតែមួយ ជូនប្រជាពលរដ្ឋកាន់តែមានប្រសិទ្ធភាព គុណភាព តម្លាភាព គណនេយ្យភាព និងឆ្លើយតបទាន់ពេលវេលា និងតម្រូវការជាក់ស្តែងរបស់ប្រជាពលរដ្ឋនៅមូលដ្ឋាន។