ភ្នំពេញ៖ នារសៀលថ្ងៃទី០៩ ខែធ្នូ ឆ្នាំ២០២១ លោក បួន ហេង ប្រធាននាយកដ្ឋានមុខងារ និងធនធាននៃអគ្គនាយកដ្ឋានរដ្ឋបាល ក្រសួងមហាផ្ទៃ រួមទាំងទីប្រឹក្សាក្រសួងមហាផ្ទៃ និងមន្ត្រីពាក់ព័ន្ធរបស់នាយកដ្ឋាន បានអញ្ជើញចូលរួមកិច្ចប្រជុំសម្របសម្រួលការអនុវត្តគម្រោងរបស់អង្គការដៃគូ និងក្រុមហ៊ុននានា ដែលកិច្ចប្រជុំនេះប្រព្រឹត្តទៅតាមរយៈប្រព័ន្ធវីដេអូConference Google Meet។

អង្គការដៃគូ និងក្រុមហ៊ុននានាដែលកំពុងអនុវត្តគម្រោងពាក់ព័ន្ធនឹងការផ្តល់សេវារបស់ការិយាល័យច្រកចេញចូលតែមួយ និងការិយាល័យប្រជាពលរដ្ឋ ក្រោមកិច្ចសហការជាមួយនាយកដ្ឋានមុខងារ និងធនធាន ត្រូវរៀបចំកិច្ចប្រជុំនេះឡើង ក្នុងគោលបំណងដើម្បីស្វែងយល់ និងពិនិត្យមើលអំពីទស្សនទាន រួមទាំងទិសដៅនានារបស់ក្រសួងមហាផ្ទៃ ពិសេសអគ្គនាយកដ្ឋានរដ្ឋបាល ដែលមាននាយកដ្ឋានមុខងារ និងធនធានជាសេនាធិការ ក្នុងការរៀបចំ និងការគ្រប់គ្រងការផ្តល់សេវាជូនប្រជាពលរដ្ឋអោយកាន់តែទំនើបតាមរយៈប្រព័ន្ធអនឡាញ និងការរៀបចំឧបករណ៍បច្ចេកវិទ្យាថ្មីៗក្នុងការផ្តល់ព័ត៌មានជូនប្រជាពលរដ្ឋ។ កិច្ចប្រជុំនេះក៏ត្រូវពិនិត្យ ពិភាក្សាបែងចែកខេត្ត ក្រុង ស្រុក ខណ្ឌគោលដៅរបស់គម្រោងទាំងនេះ កុំអោយត្រួតជាន់គ្នា ព្រមទាំងពិភាក្សារកជម្រើសណាមួយល្អប្រសើរបំផុតក្នុងការបង្កើតឧបករណ៍បច្ចេកវិទ្យាថ្មីៗ(App)សម្រាប់ប្រជាពលរដ្ឋ។