ទីស្តីការក្រសួងមហាផ្ទៃ៖ ផ្អែកតាមចំណារដ៏ខ្ពង់ខ្ពស់របស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាព្រឹកថ្ងៃទី១១ ខែមីនា ឆ្នាំ២០២៦ វេលាម៉ោង ០៩:០០នាទី ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល បានរៀបចំកិច្ច​ប្រជុំពិភាក្សា​ជាមួយតំណាង​អគ្គនាយក​ដ្ឋាន​អត្តសញ្ញាណកម្ម ក្នុងគោលបំណងជំរុញការរៀបចំយន្តការ​ផ្តល់សេវាអត្តសញ្ញាណប័ណ្ណសញ្ជាតិខ្មែរ​ឱ្យកាន់តែមានភាពងាយស្រួល និងប្រសិទ្ធភាព ។

កិច្ចប្រជុំនេះមានការអញ្ជើញចូលរួមពីតំណាងអគ្គនាយកដ្ឋានអត្តសញ្ញាណកម្ម ថ្នាក់ដឹកនាំ និងមន្ត្រីអគ្គនាយកដ្ឋានរដ្ឋបាល ប្រធាននាយកដ្ឋានមុខងារ និងធនធាន ព្រមទាំងអ្នកពាក់ព័ន្ធសរុបប្រមាណ២០រូប។

គោលបំណងសំខាន់នៃកិច្ចប្រជុំនេះ រួមមាន៖

•  ពិភាក្សាលើការរៀបចំយន្តការផ្តល់សេវាអត្តសញ្ញាណប័ណ្ណសញ្ជាតិខ្មែរ នៅតាមអង្គភាពច្រកចេញ​ចូលតែមួយនៃរដ្ឋបាលថ្នាក់ក្រោមជាតិ 

•  ការធ្វើសន្ធានកម្មទិន្នន័យការតភ្ជាប់ (Integration) រវាងកម្មវិធីព័ត៌មានវិទ្យាសម្រាប់​គ្រប់គ្រងនិងផ្តល់សេវារដ្ឋបាលតាមយន្តការច្រកចេញចូលតែមួយ ជាមួយនឹងប្រព័ន្ធគ្រប់គ្រងទិន្នន័យរបស់អគ្គនាយកដ្ឋានអត្តសញ្ញាណកម្ម 

ជាលទ្ធផល អគ្គនាយកដ្ឋានទាំងពីរបានឯកភាពបន្តកិច្ចសហការលើការងារបច្ចេកទេស  ដើម្បីធានាឱ្យបាននូវការតភ្ជាប់ប្រព័ន្ធទិន្នន័យប្រកបដោយសុវត្ថិភាព និងប្រសិទ្ធភាពខ្ពស់ ស្របតាមគោលនយោបាយកំណែទម្រង់រដ្ឋបាលសាធារណៈរបស់រាជរដ្ឋាភិបាល ។