ព័ត៌មានលម្អិត
វគ្គបណ្ដុះបណ្ដាល ស្ដីពីតួនាទី ភារកិច្ច និងរបៀបរបបបំពេញការងាររបស់ការិយាល័យច្រកចេញចូលតែមួយ និងការិយាល័យប្រជាពលរដ្ឋ
ថ្ងៃចេញផ្សាយ: January 30, 2019
ប្រភព: OWSO
ខេត្តបាត់ដំបង៖ នាព្រឹកថ្ងៃចន្ទ ៨រោច ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៨ ខែ មករា ឆ្នាំ២០១៩ នាយកដ្ឋានមុខងារ និងធនធាន នៃអគ្គនាយកដ្ឋានរដ្ឋបាល ក្រសួងមហាផ្ទៃ បានរៀបចំវគ្គបណ្ដុះបណ្ដាល ស្ដីពីតួនាទី ភារកិច្ច និងរបៀបរបបបំពេញការងាររបស់ការិយាល័យច្រកចេញចូលតែមួយ និងការិយាល័យប្រជាពលរដ្ឋ ក្រោមអធិបតីភាព ឯកឧត្តម ស៊ វរិន អគ្គនាយករង នៃអគ្គនាយកដ្ឋានរដ្ឋបាលក្រសួងមហាផ្ទៃ និងជាអនុប្រធានលេខាធិការដ្ឋាន គ.ជ.អ.ប ដោយមានកិច្ចសហប្រតិបត្តិការជាមួយគម្រោងសហភាពអឺរ៉ុបសម្រាប់គាំទ្រដល់កំណែទម្រង់វិមជ្ឈការ និងរដ្ឋបាល (EU DAR) ។ ក្នុងពិធីបើកវគ្គបណ្ដុះបណ្ដាលនេះមានការអញ្ជើញចូលរួមពីតំណាងក្រសួងមហាផ្ទៃ តំណាងរដ្ឋបាលខេត្តបាត់ដំបង តំណាងអង្គការ GIZ និងមន្ត្រីពាក់ព័ន្ធនៃរដ្ឋបាលស្រុកគោលដៅចំនួន១១ស្រុកដែលរួមមាន៖ ស្រុកឈូក ស្រុកទឹកឈូ ស្រុកសំរោងទង ស្រុករវៀង ស្រុកកៀនស្វាយ ស្រុកស្ទោង ស្រុកស្នួល ស្រុកបាកាន ស្រុកកំចាយមារ ស្រុកកំពង់សៀម និងស្រុកកំរៀង សរុបប្រមាណ ២១០នាក់ នៅសាលប្រជុំសណ្ឋាគារខេមរាបាត់ដំបង១។
គ្គបណ្ដុះបណ្ដាលនេះនឹងប្រព្រឹត្តិទៅរយៈពេល០៣ថ្ងៃ ចាប់ពីថ្ងៃទី២៨-៣០ ខែមករា ឆ្នាំ២០១៩ ក្នុងគោលបំណងដើម្បីធ្វើការបង្ហាត់បង្ហាញពីតួនាទី ភារកិច្ច និងរបៀបរបបបំពេញការងាររបស់ការិយាល័យច្រកចេញចូលតែមួយ និងការិយាល័យប្រជាពលរដ្ឋ ដល់មន្ត្រីពាក់ព័ន្ធទាំងអស់ក្នុងការបំពេញការងាររបស់ខ្លួនឱ្យបានល្អ ឆ្លើយតបទៅនឹងតម្រូវការរបស់ប្រជាពលរដ្ឋឱ្យបានឆាប់រហ័ស តម្លាភាព និង គណនេយ្យភាព។
ក្នុងពិធីបើកវគ្គបណ្តុះបណ្តាល ឯកឧត្តម ស៊ វរិន អគ្គនាយករង នៃអគ្គនាយកដ្ឋានរដ្ឋបាល ក្រសួងមហាផ្ទៃ និងជាអនុប្រធានលេខាធិការដ្ឋាន គ.ជ.អ.ប មានប្រសាសន៍ថា វគ្គបណ្តុះបណ្តាលនេះ មានគោលបំណងកសាងសមត្ថភាព និងផ្តល់បទពិសោធន៍ដល់ថ្នាក់ដឹកនាំ និងមន្ត្រីនៃការិយាល័យច្រកចេញចូលតែមួយ និងការិយាល័យប្រជាពលរដ្ឋ ដើម្បីផ្តល់សេវារដ្ឋបាលជូនប្រជាពលរដ្ឋ ប្រកបដោយគុណភាព ប្រសិទ្ធភាព តម្លាភាព គណនេយ្យភាព ឆ្លើយតបតាមតម្រូវការ និងពិសេសទទួលបានការពេញចិត្តពីប្រជាពលរដ្ឋ។ ឯកឧត្តមបន្តថា ក្រោយពីការបណ្តុះបណ្តាលរួចរាល់ ក្រសួងមហាផ្ទៃនឹងសម្ពោធដាក់ឱ្យអនុវត្តការផ្តល់សេវាតាមការិយាល័យច្រកចេញចូលតែមួយនៃស្រុកគោលដៅថ្មីទាំង០៦ក្នុងពេលឆាប់ៗខាងមុខនេះ។ នេះជាសមិទ្ធិផលថ្មីមួយទៀត បន្ថែមលើការិយាល័យច្រកចេញចូលតែមួយនៃក្រុង ស្រុក ខណ្ឌគោលដៅ ចំនួន៥២ ដែលត្រូវបានបង្កើត និងដាក់ឱ្យដំណើរការផ្តល់សេវាជូនប្រជាពលរដ្ឋរួចហើយ។ ជាមួយគ្នានេះ ឯកឧត្តមបានបញ្ជាក់បន្ថែមថា វគ្គបណ្តុះបណ្តាលនេះមានរយៈពេលចំនួន៣ថ្ងៃ មានការចូលរួមធ្វើបទបង្ហាញរបស់ថ្នាក់ដឹកនាំនាយកដ្ឋានមុខងារនិងធនធាន នៃអគ្គនាយកដ្ឋានរដ្ឋបាលក្រសួងមហាផ្ទៃ និងមន្ត្រី ទីប្រឹក្សាដែលមានបទពិសោធន៍ ដោយផ្តោតលើប្រធានបទសំខាន់ៗដូចជា គោលការណ៍នៃការផ្ដល់សេវាសាធារណៈ និងទស្សនទាននៃការបង្កើតការិយាល័យច្រកចេញចូលតែមួយ តួនាទី ភារកិច្ច របៀបរបបធ្វើការងាររបស់ការិយាល័យច្រកចេញចូលតែមួយ និងការិយាល័យប្រជាពលរដ្ឋ នីតិវិធី និងបែបបទនៃការសម្រុះសម្រួលដោះស្រាយពាក្យបណ្តឹងរបស់ការិយាល័យប្រជាពលរដ្ឋ ក្រមសីលធម៌សម្រាប់មន្ត្រី ដំណើរការរៀបចំផ្សព្វផ្សាយព័ត៌មាន បដិសណ្ឋារកិច្ច និងការផ្តល់សេវាកម្មល្អ។
នៅថ្ងៃចុងក្រោយនៃវគ្គបណ្តុះបណ្តាល សិក្ខាកាមទាំងអស់ត្រូវបានផ្តល់ឱកាសឱ្យធ្វើទស្សនកិច្ចសិក្សានៅការិយាល័យច្រកចេញចូលតែមួយ និងការិយាល័យប្រជាពលរដ្ឋក្រុងបាត់ដំបង ខេត្តបាត់ដំបងដើម្បីទទួលបានបទពិសោធន៍ផ្ទាល់ក្នុងការបំពេញការងាររបស់មន្ត្រីក្នុងការផ្តល់សេវាជូនប្រជាពលរដ្ឋ។
ក្នុងពិធីបិទវគ្គបណ្តុះបណ្តាលនៅថ្ងៃទី៣០ ខែមករា ឆ្នាំ២០១៩ លោក បួន ហេង ប្រធាននាយកដ្ឋានមុខងារនិងធនធានធ្វើការផ្ដាំផ្ញើនូវការងារមួយចំនួនដល់សិក្ខាកាមទាំងអស់ត្រូវយកចិត្តទុកដាក់នៅពេលត្រលប់ទៅវិញដូចខាងក្រោម ៖
ទីមួយ៖ ត្រូវយកចំណេះដឹងដែលទទួលបានពីវគ្គបណ្ដុះបណ្ដាលនេះ និងបទពិសោធន៍នានាដែលទទួលបានពីទស្សនកិច្ចសិក្សា យកទៅអនុវត្ដឱ្យបានជោគជ័យនៅមូលដ្ឋានរបស់ខ្លួន ដើម្បីរួមចំណែកជាមួយរាជរដ្ឋាភិបាលក្នុងការកែទម្រង់ការផ្ដល់សេវារដ្ឋបាលឱ្យកាន់តែប្រសើរឡើង ដើម្បីកាត់បន្ថយភាពក្រីក្ររបស់ប្រជាពលរដ្ឋ។ ពាក់ព័ន្ធនឹងកិច្ចការនេះ លោកពិតជាមានសេចក្ដីសង្ឃឹម និងមានការជឿជាក់យ៉ាងមុតមាំថា ស្រុកគោលដៅថ្មីទាំង១១នេះនឹងអនុវត្ដការផ្តល់សេវារដ្ឋបាលក្នុងដែនសមត្ថកិច្ចរបស់ខ្លួន ប្រកបដោយជោគជ័យ ដូចក្រុង ស្រុក ខណ្ឌគោលដៅដទៃទៀតដែលបាន និងកំពុងអនុវត្ដ រហូតមកដល់បច្ចុប្បន្ននេះ។
ទីពីរ៖ ត្រូវខិតខំប្រឹងប្រែងក្នុងការសិក្សាស្រាវជ្រាវ និងស្វែងយល់បន្ថែមទៀតលើឯកសារ គោលការណ៍ និងនីតិវិធីពាក់ព័ន្ធពីគ្រប់មជ្ឈដ្ឋាន ដើម្បីធ្វើបច្ចុប្បន្នភាពចំណេះដឹងរបស់ខ្លួនឱ្យស្របតាមការរីកចម្រើនដ៏ឆាប់រហ័សនៃកំណែទម្រង់ក្នុងសង្គមជាតិយើង ក៏ដូចជានៅក្នុងតំបន់ និងនៅក្នុងសកលលោកផងដែរ។
ក្នុងការអនុវត្ដជាក់ស្ដែង ប្រសិនបើមានបញ្ហាប្រឈមដែលមិនអាចដោះស្រាយបាន ត្រូវធ្វើការទំនាក់ទំនង និងពិគ្រោះយោបល់ជាមួយក្រុង ស្រុក ខណ្ឌគោលដៅផ្សេងទៀត ជាពិសេសក្រុង ស្រុក ខណ្ឌគោលដៅដែលមានបទពិសោធន៍ជាយូរមកហើយ ដើម្បីរៀនសូត្រពីគ្នាទៅវិញទៅមក។
ទីបី៖ ចំណេះដឹង និងបទពិសោធន៍ដែលទទួលបាននៅពេលនេះ ជាធនធានដ៏សំខាន់មិនអាចខ្វះបានសម្រាប់យកទៅអនុវត្ដនាពេលខាងមុខឆាប់ៗនេះ។ ក៏ប៉ុន្ដែបើមានតែចំណេះដឹង និងបទពិសោធន៍ ដោយខ្វះឆន្ទៈ និងការប្ដេជ្ញាចិត្ដ ខ្វះសីលធម៌ គ្មានឧត្ដមគតិ និងមនសិកាវិជ្ជាជីវៈ នោះជាប្រការមួយកាន់តែគ្រោះថ្នាក់ថែមទៀតក្នុងការអនុវត្តការផ្តល់សេវាជូនប្រជាពលរដ្ឋ។ អាស្រ័យហេតុនេះ លោកសូមឱ្យអស់លោក លោកស្រីដែលជាតួអង្គមួយដ៏សំខាន់នៃកំណែទម្រង់នេះត្រូវយកចំណេះដឹង និងបទពិសោធន៍ដែលទទួលបានទាំងនេះ ទៅអនុវត្ដប្រកបដោយស្មារតីទទួលខុសត្រូវខ្ពស់ ប្រកបដោយក្រមសីលធម៌ និងមនសិការវិជ្ជាជីវៈ។ សូមអស់លោក លោកស្រីចាត់ទុកថា ភារកិច្ចដែលអស់លោក លោកស្រីនឹងត្រូវបំពេញនេះ គឺជាភារកិច្ចស្នូល និងអាទិភាពដែលត្រូវអនុវត្តឱ្យខាងតែបាន។
ទីបួន៖ ដើម្បីសម្រេចបាននូវភារកិច្ចទាំងអស់នេះប្រកបដោយជោគជ័យ ចាំបាច់ត្រូវមានរបៀបរបបធ្វើការងារមួយច្បាស់លាស់ ដោយមានការបែងចែកនូវតួនាទី ភារកិច្ច និងការទទួលខុសត្រូវឱ្យបានជាក់លាក់តាមផ្នែកនីមួយៗ ស្របតាមសមត្ថភាព និងសមត្ថកិច្ចរៀងៗខ្លួន ព្រមទាំងត្រូវ មានរបបប្រជុំជាទៀងទាត់ដើម្បីដោះស្រាយបញ្ហា។ របៀបធ្វើការងារជាក្រុម ការសាមគ្គីភាពផ្ទៃក្នុងរឹងមាំ និងកិច្ចសហប្រតិបត្ដិការល្អពីគ្រប់ភាគីពាក់ព័ន្ធនានា និងពីគ្រប់ផ្នែកក្នុងរចនាសម្ព័ន្ធនៃការិយាល័យច្រកចេញចូលតែមួយ គឺជាកត្ដាកំណត់នូវភាពជោគជ័យដែលពុំអាចខ្វះបាន។ ទន្ទឹមនឹងនេះ សូមលោកអភិបាលស្រុកគោលដៅទាំងអស់ ត្រូវធ្វើការសហការ ពិភាក្សា ពិគ្រោះយោបល់ជាមួយមន្ទីរ អង្គភាពពាក់ព័ន្ធនានាពាក់ព័ន្ធនឹងភាពពុំច្បាស់លាស់នៃការងារបច្ចេកទេស និងការធ្វើបច្ចុប្បន្នភាពទិន្នន័យអាជីវកម្ម សេវាកម្មដែលពាក់ព័ន្ធនឹងការធ្វើប្រតិភូកម្ម និងត្រៀមចុះធ្វើការស្រង់ទិន្នន័យតាមទីកន្លែង អាជីវកម្មក្នុងដែនសមត្ថកិច្ចរបស់ក្រុង។
ទីប្រាំ៖ អភិបាលស្រុក ត្រូវរៀបចំផែនការផ្សព្វផ្សាយឱ្យបានច្បាស់លាស់ ដូចជា រៀបចំវេទិកាសាធារណៈប្រចាំឆមាស និងប្រចាំឆ្នាំ ពាក់ព័ន្ធនឹងការផ្តល់សេវារដ្ឋបាលរបស់ការិយាល័យច្រកចេញចូលតែមួយ ដើម្បីឆ្លើយតបនឹងសំណើ សំណូមពរ និងទទួលព័ត៌មានត្រឡប់ពីប្រជាពលរដ្ឋ។ ក្នុងការត្រៀមរៀបចំចាត់ចែង និងធ្វើការផ្សព្វផ្សាយជាសាធារណៈអំពីតម្លៃសេវា និងពត៌មានសំខាន់ៗផ្សេងទៀតស្តីពីសេវា ត្រូវធ្វើឡើងតាមគ្រប់មធ្យោបាយនានា ដូចជាក្តារព័ត៌មានសាធារណៈ បណ្ដាញព័ត៌មាន បណ្ដាញសង្គម ខិត្តប័ណ្ណ វេទិកាសាធារណៈ និងកិច្ចប្រជុំនានាជាដើម។
ទីប្រាំមួយ៖ ការិយាល័យប្រជាពលរដ្ឋមានតួនាទីសំខាន់ក្នុងការទទួល និងសម្រុះសម្រួលដោះស្រាយពាក្យបណ្តឹងតវ៉ានានារបស់ប្រជាពលរដ្ឋក្រៅប្រព័ន្ធតុលាការ ដែលពាក់ព័ន្ធនឹងការផ្តល់សេវាសាធារណៈ និងការគ្រប់គ្រងរដ្ឋបាលនៅថ្នាក់ក្រោមជាតិ។ ជាមួយគ្នានេះផងដែរ លោកសូមផ្ដាំផ្ញើជូនអស់លោក លោកស្រី ប្រធានការិយាល័យប្រជាពលរដ្ឋ ត្រូវយកចំណេះដឹង និងបទពិសោធន៍ ព្រមទាំងតួនាទី ភារកិច្ចដែលបានកំណត់ទៅអនុវត្ដឱ្យមានប្រសិទ្ធភាពខ្ពស់ ព្រមទាំងធ្វើសកម្មភាពដោយអព្យាក្រឹត សក្ដិសមជាតំណាងរបស់ប្រជាពលរដ្ឋដ៏ពិតប្រាកដ ដើម្បីធានាឱ្យការផ្ដល់សេវាជូនប្រជាពលរដ្ឋប្រកបដោយប្រសិទ្ធភាព គុណភាព តម្លាភាព គណនេយ្យភាព និងគ្មានអំពើពុករលួយ។
ជាទីបញ្ចប់ លោកបានថ្លែងអំណរគុណយ៉ាងជ្រាលជ្រៅចំពោះវត្ដមានដ៏ថ្លៃថ្លារបស់អស់លោក លោកស្រី ដែលបានអញ្ជើញចូលរួមក្នុងពិធីបិទវគ្គបណ្ដុះបណ្ដាលនាឱកាសនេះ និងសូមជូនពរ ដល់អស់លោក លោកស្រីទាំងអស់ជួបប្រទះនូវពុទ្ធពរទាំងឡាយ ៤ប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។
ព័ត៌មានថ្មីៗ
