បាត់ដំបង៖ ក្នុងគោលបំណងដើម្បីលើកម្ពស់ការយល់ដឹង និងដើម្បីឲ្យមានការចូលរួមអនុវត្តឲ្យមានប្រសិទ្ធភាពខ្ពស់ដល់អ្នកពាក់ព័ន្ធនានានៅរដ្ឋបាលថ្នាក់ក្រោមជាតិ នាយកដ្ឋានមុខងារ និងធនធាននៃអគ្គនាយកដ្ឋានរដ្ឋបាល ក្រសួងមហាផ្ទៃ សហការជាមួយអង្គការ GIZ ក្រោមកម្មវិធីកំណែទម្រង់វិមជ្ឈការ និងរដ្ឋបាល (កម្មវិធី DAR) បានរៀបចំសិក្ខាសាលាផ្សព្វផ្សាយអនុក្រឹត្យលេខ ១៩ អនក្រ.បក ស្ដីពីការបង្កើតការិយាល័យប្រជាពលរដ្ឋ នៅរដ្ឋបាលថ្នាក់ក្រោមជាតិ ចាប់ពីថ្ងៃទី ១១ ដល់ថ្ងៃទី ១៣ ខែធ្នូ ឆ្នាំ២០១៩ ដល់ស្រុកចំនួន០៤នៃខេត្តបាត់ដំបង ដែលរួមមាន ស្រុកបវេល ស្រុករតនមណ្ឌល ស្រុកបាណន់ និងស្រុកមោងឫស្សី ។ ក្នុងកម្មវិធីផ្សព្វផ្សាយនេះមានការអញ្ជើញចូលរួមពីសមាជិក សមាជិកាក្រុមប្រឹក្សាស្រុក អភិបាល នាយករដ្ឋបាល និងនាយករងរដ្ឋបាល ប្រធានការិយាល័យប្រជាពលរដ្ឋ និងជំនួយការ ប្រធាន អនុប្រធានការិយាល័យប្រជាពលរដ្ឋ ព្រមទាំងមេឃុំ ចៅសង្កាត់ និងអ្នកពាក់ព័ន្ធនានា ។