ពិធីនេះមានការអញ្ជើញចូលរួមពីថ្នាក់ដឹកនាំក្រសួង ស្ថាប័នពាក់ព័ន្ធថ្នាក់ជាតិ អគ្គនាយកដ្ឋានចំណុះក្រសួងមហាផ្ទៃ ថ្នាក់ដឹកនាំរដ្ឋបាលរាជធានី ខេត្ត ក្រុង ស្រុក ខណ្ឌ ប្រធានអង្គភាពច្រកចេញចូលតែមួយ ប្រធានការិយាល័យប្រជាពលរដ្ឋរាជធានី ខេត្ត ប្រធានការិយាល័យច្រកចូលតែមួយ ប្រធានការិយាល័យប្រជាពលរដ្ឋក្រុង ស្រុក ខណ្ឌ ព្រមទាំងដៃគូអភិវឌ្ឍន៍ និងអ្នកពាក់ព័ន្ធនានា សរុបប្រមាណ ៥៧០រូប។

បន្ទាប់ពីឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល បានឡើងអានរបាយការណ៍លទ្ធផល និងដំណើរការរៀបចំសិក្ខាសាលារួចមក ឯកឧត្តមអភិសន្តិបណ្ឌិត ស សុខា បានថ្លែងកោតសរសើរវាយតម្លៃខ្ពស់ចំពោះវត្តមាន និងការចូលរួមផ្តល់ជាមតិយោបល់ដ៏មានសារៈសំខាន់របស់ថ្នាក់ដឹកនាំក្រសួង ស្ថាប័នថ្នាក់ជាតិ និងថ្នាក់ក្រោមជាតិក្នុងសិក្ខាសាលារយៈពេល២ថ្ងៃនេះ។

ឯកឧត្តមបានគូសបញ្ជាក់ថា ការផ្តល់សេវាតាមយន្តការច្រកចេញចូលតែមួយ គឺជាកិច្ចការចាំបាច់ក្នុងការអនុវត្តកម្មវិធីកំណែទម្រង់វិមជ្ឈការ និងវិសហមជ្ឈការ ដើម្បីធានាបាននូវសេចក្តីសុខក្សេមក្សាន្ត និងកំណើនសេដ្ឋកិច្ច រួមចំណែកសម្រេចចក្ខុវិស័យកម្ពុជាឆ្នាំ២០៣០ជាប្រទេសមានចំណូលមធ្យមកម្រឹតខ្ពស់ និងឆ្នាំ២០៥០ជាប្រទេសមានចំណូលខ្ពស់។

ក្នុងឱកាសនោះ ឯកឧត្តមឧបនាយករដ្ឋមន្ត្រីបានផ្តល់អនុសាសន៍ណែនាំមួយចំនួនដល់ក្រសួង ស្ថាប័នពាក់ព័ន្ធ ដោយត្រូវពន្លឿនការរៀបចំកែសម្រួល ឬដាក់ចេញសេចក្ដីណែនាំបច្ចេកទេសនៃការផ្ដល់សេវារដ្ឋបាលតាមវិស័យជំនាញនីមួយៗ ដោយកាត់បន្ថយជាអតិបរមានូវបែបបទ នីតិវិធីនៃការផ្ដល់សេវារដ្ឋបាល និងទម្រង់ឯកសារភ្ជាប់ដែលមិនចាំបាច់។ ក្រសួង ស្ថាប័នត្រូវណែនាំដល់មន្ទីរជំនាញរបស់ខ្លួនក្នុងការគាំទ្រពេញទំហឹងដល់កិច្ចដំណើរការផ្ដល់សេវាតាមយន្តការច្រកចេញចូលតែមួយ ព្រមទាំងត្រូវបន្តកិច្ចសហការល្អជាមួយអគ្គនាយកដ្ឋានរដ្ឋបាល ក្រសួងមហាផ្ទៃ ក្នុងការចុះគាំទ្រ តាមដាន ត្រួតពិនិត្យ និងវាយតម្លៃការអនុវត្តមុខងារផ្ដល់សេវារដ្ឋបាលដែលបានផ្ទេរទៅឱ្យរដ្ឋបាលថ្នាក់ក្រោមជាតិ ដើម្បីធានាប្រសិទ្ធភាពនៃការផ្ដល់សេវា និងចូលរួមដោះស្រាយបញ្ហាប្រឈមនានាដែលរដ្ឋបាលថ្នាក់ក្រោមជាតិបានជួបប្រទះ។ ជាមួយគ្នានេះ ឯកឧត្តមក៏បានណែនាំដល់អគ្គនាយកដ្ឋានរដ្ឋបាលក្រសួងមហាផ្ទៃ ត្រូវរៀបចំបង្កើតក្រុមការងារតាមដាន និងវាយតម្លៃការផ្តល់សេវាតាមយន្តការច្រកចេញចូលតែមួយថ្នាក់ក្រោមជាតិក្នុងគោលបំណងលើកកម្ពស់គុណភាពនៃការផ្តល់សេវា និងផ្តល់ការលើកទឹកចិត្តរដ្ឋបាល ដែលខិតខំផ្តល់សេវាជូនប្រជាពលរដ្ឋ។

សម្រាប់រដ្ឋបាលរាជធានី ខេត្ត ក្រុង ស្រុក ខណ្ឌ ឯកឧត្តមឧបនាយករដ្ឋមន្ត្រីបានណែនាំឱ្យរដ្ឋបាលរាជធានី ខេត្ត និងរដ្ឋបាលក្រុង ស្រុក ខណ្ឌត្រូវប្រមូលផ្ដុំការផ្ដល់សេវារដ្ឋបាលដែលស្ថិតក្នុងដែនសមត្ថកិច្ចរបស់ខ្លួន (ទាំងសេវាផ្ទាល់របស់ខ្លួន និងប្រភេទសេវាដែលផ្ទេរពីក្រសួង ស្ថាប័នពាក់ព័ន្ធ) មកអនុវត្តតាមអង្គភាពច្រកចេញចូលតែមួយ និងការិយាល័យច្រកចេញចូលតែមួយ ស្របតាមគោលការណ៍ បែបបទ និងនីតិវិធីនៃការផ្តល់សេវាដែលបានកំណត់ និងត្រូវបន្តសហការឱ្យបានស្អិតរមួតជាមួយមន្ទីរ អង្គភាពពាក់ព័ន្ធនានា ក្នុងការពិនិត្យ និងផ្តល់យោបល់លើការស្នើសុំសេវារបស់ប្រជាពលរដ្ឋឱ្យបានឆាប់រហ័ស និងទាន់ពេលវេលាដែលបានកំណត់។ រដ្ឋបាលរាជធានី ខេត្ត ក្រុង ស្រុក ខណ្ឌ ត្រូវធ្វើការផ្សព្វផ្សាយព័ត៌មានឱ្យបានទូលំទូលាយជូនប្រជាពលរដ្ឋ និងអ្នកពាក់ព័ន្ធ អំពីយន្តការច្រកចេញចូលតែមួយ និង ការិយាល័យប្រជាពលរដ្ឋ ក៏ដូចជាការធ្វើទំនើបកម្មនានាពាក់ព័ន្ធនឹងការផ្ដល់សេវារដ្ឋបាលតាមយន្តការច្រកចេញចូលតែមួយ និងការសម្រុះសម្រួលដោះស្រាយបណ្ដឹងរបស់ការិយាល័យប្រជាពលរដ្ឋ។

ចំពោះក្រុមប្រឹក្សា និងគណៈអភិបាលនៃរដ្ឋបាលរាជធានី ខេត្ត និងរដ្ឋបាលក្រុង ស្រុក ខណ្ឌត្រូវពង្រឹងការទទួលខុសត្រូវប្រកបដោយភាពម្ចាស់ការក្នុងការអនុវត្តមុខងារ និងការប្រើប្រាស់ធនធានដែលបានផ្ទេរពីក្រសួង ស្ថាប័នថ្នាក់ជាតិ ឱ្យមានប្រសិទ្ធភាព តម្លាភាព និងត្រឹមត្រូវ ស្របតាមលក្ខខណ្ឌ គោលការណ៍ នីតិវិធី និងស្តង់ដាដែលបានកំណត់។