ព័ត៌មានលម្អិត
ឯកឧត្តម បួន ហេង អញ្ជើញបើកវគ្គតម្រង់ទិសស្តីពីការប្រើប្រាស់ប្រព័ន្ធគ្រប់គ្រងទិន្នន័យបណ្តឹង និងព័ត៌មានផ្សេងៗរបស់ការិយាល័យប្រជាពលរដ្ឋក្រុង ស្រុក ខណ្ឌ វគ្គទី៣
ថ្ងៃចេញផ្សាយ: August 6, 2025
ប្រភព: OWSO
ខេត្តកំពត៖ នាព្រឹកថ្ងៃទី៦ ខែសីហា ឆ្នាំ២០២៥ ឯកឧត្តម បួន ហេង អគ្គនាយករងនៃអគ្គនាយកដ្ឋានរដ្ឋបាល ក្រសួងមហាផ្ទៃ និងជាអគ្គលេខាធិការរង នៃ គ.គ.ស បានអញ្ជើញជាអធិបតីក្នុងពិធីបើកវគ្គតម្រង់ទិសស្តីពីការប្រើប្រាស់ប្រព័ន្ធគ្រប់គ្រងទិន្នន័យបណ្តឹង និងព័ត៌មានផ្សេងៗរបស់ការិយាល័យប្រជាពលរដ្ឋក្រុង ស្រុក ខណ្ឌ នៅសាលប្រជុំសាលាខេត្តកំពត។
នៅក្នុងពិធីបើកវគ្គតម្រង់ទិសនេះក៏មានការអញ្ជើញចូលរួមជាអធិបតីពី ឯកឧត្តម ង៉ាន់ ថារឹទ្ធ អភិបាលរង នៃគណៈអភិបាលខេត្តកំពត លោក អ៊ឹង កែវរតនៈ ប្រធាននាយកដ្ឋានមុខងារ និងធនធាន លោក នឹម សួរ តំណាងគម្រោងកម្មវិធី ISD/GIZ លោក លោកស្រី ប្រធាន បុគ្គលិកជំនួយការរបស់ការិយាល័យប្រជាពលរដ្ឋក្រុង ស្រុក ខណ្ឌ ចំនួន៧២គោលដៅ និងអ្នកពាក់ព័ន្ធសរុបចំនួន១០៩នាក់។
វគ្គតម្រង់ទិសវគ្គទី៣នេះនឹងប្រព្រឹត្តទៅរយៈពេល០២ថ្ងៃ ក្នុងគោលបំណងដើម្បីពង្រឹងសមត្ថភាពប្រធាន និងបុគ្គលិកជំនួយការរបស់ការិយាល័យប្រជាពលរដ្ឋក្រុង ស្រុក ខណ្ឌលើការប្រើប្រាស់ប្រព័ន្ធគ្រប់គ្រងទិន្នន័យបណ្តឹង និងព័ត៌មានផ្សេងៗក្នុងការកត់ត្រា តាមដាន និងគ្រប់គ្រងទិន្នន័យបណ្តឹង និងព័ត៌មានផ្សេងៗដែលទទួលបានពីប្រជាពលរដ្ឋតាមគ្រប់មធ្យោបាយ។
សូមបញ្ជាក់ដែរថា វគ្គតម្រង់ទិសស្តីពីការប្រើប្រាស់ប្រព័ន្ធគ្រប់គ្រងទិន្នន័យបណ្តឹង និងព័ត៌មានផ្សេងៗរបស់ការិយាល័យប្រជាពលរដ្ឋក្រុង ស្រុក ខណ្ឌ វគ្គទី១ គឺប្រព្រឹត្តទៅនៅថ្ងៃទី១៦ ដល់ថ្ងៃទី១៧ ខែកក្កដា ឆ្នាំ២០២៥ នៅសាលាខេត្តបន្ទាយមានជ័យ ដែលមានការិយាល័យប្រជាពលរដ្ឋចំនួន ៦៦គោលដៅ និងសមាសភាពពាក់ព័ន្ធចូលរួមសរុបចំនួន ១០៣នាក់ និងវគ្គទី២ នៅថ្ងៃទី២៣ ដល់ថ្ងៃទី១២៤ ខែកក្កដា ឆ្នាំ២០២៥ នៅសាលាខេត្តតាកែវ ដែលមានការិយាល័យប្រជាពលរដ្ឋចំនួន ៦៨គោលដៅ និងសមាសភាពពាក់ព័ន្ធចូលរួមសរុបចំនួន ១១២នាក់។
